२५ मंसिर २०८२,काठमाण्डौ- तत्कालिन सरकारको अंगमा रहेर जेनजी पुस्ताको बिद्रोहमा दमन गरेको विषयमा बयान दिन उच्च स्तरीय न्यायीक जाँचबुझ आयोगले पूर्वगृहसचिव गोकर्णमणि दुवाडी र प्रहरीका पूर्वमहानिरिक्षक (आईजी) चन्द्रकुबेर खापुङलाई बिहीबार बयान लिने भएको छ।
भदौ २३ र २४ गते जेनजी आन्दोलन भएको थियो। २३ भदौमा ब्यापक दमन भएको थियो भने भोलीपल्ट विध्वंस पनि मच्चाइएको थियो।
बयानका लागि बुधबार आयोगका अध्यक्ष गौरीबहादुर कार्की, सदस्यद्वय विज्ञानराज शर्मा र विश्वेश्वर प्रसाद भण्डारीले प्रश्न तयार गरिएको छ। यसअघि मंगलबार सशस्त्र प्रहरीका महानिरीक्षक राजु अर्यालसँग सोधपुछ गरिएको थियो।
खापुङलाई आयोगले २४ घण्टे स्पष्टिकरण समेत सोधेको थियो। आयोग गठन भएको केही दिनमै आयोगले प्रहरीसँग फिल्डमा खटिएका प्रहरीहरुको विवरण माग गरेको थियो। जसको जवाफमा प्रहरीले जवानदेखि आईजीपीसम्म फिल्डमा खटिएको उल्लेख गरेर पठाएका थिए।
फिल्डमा खटिएका अन्य प्रहरी अधिकारीको बयान समेत लिइसकिएको छ। अप्रेशन अफिसरका रुपमा काम गरेकाले तत्कालिन प्रमुखको आदेशका कारण गोली चलाइएको बयानमा बताएका थिए।
पूर्वगृहसचिव गोकर्णमणी दुवाडीसँग पनि बिहीबार नै बयान लिने भएको छ। जेनजी आन्दोलनको समयमा गृहसचिव रहेका दुवाडीलाई अन्तरिम सरकारले असोज ७ गते सरुवा गरेको थियो। उनलाई गृहसचिवबाट हटाएर राष्ट्रिय योजना आयोगमा सरुवा गरिएको छ। गृहसचिवको जिम्मेवारी रामेश्वर दंगालले पाएका छन्।
दुवाडी र खापुङलाई स्थानहद समेत तोकिएको थियो।
