पौष २७, २०८२ आईतवार,काठमाडौं। इन्डियन आइडल विजेता प्रशान्त तामाङको ४२ वर्षको उमेरमा निधन भएको छ ।
ह्रदयघात भएर नयाँ दिल्लीको द्वारकास्थित एक अस्पतालमा पुर्याउँदा अस्पतालले उनलाई मृत घोषणा गरेको हो ।
‘उहाँ दिल्लीमै हुनुहुन्थ्यो । आज बिहान उहाँको निधन भएको खबर पाएँ । उहाँको परिवार र नजिकका आफन्तबाट मैले यो खबर पाएको हुँ,’ फिल्मकर्मी राजेश घतानीले भने ।
अरुणाचल प्रदेशमा कार्यक्रम सकेर राजधानी फर्किएलगत्तै उनको मृत्यु भएको भारतीय संचारमाध्यमहरुले जनाएका छन् ।
निधनअघि उनलाई कुनै गम्भीर स्वास्थ्य समस्या वा असहजता देखिएको थिएन । ४ जनवरी १९८३ मा पश्चिम बंगालको दार्जिलिङमा जन्मिएका तामाङले साधारण पृष्ठभूमिबाट राष्ट्रिय स्तरको ख्याति हासिल गरेका थिए ।
सानै उमेरमा पिता गुमाएपछि परिवारको जिम्मेवारी सम्हाल्न उनले कोलकाता प्रहरीमा कन्स्टेबलका रूपमा सेवा थालेका थिए र प्रहरी ब्याण्ड (अर्केस्ट्रा) मा गीत गाउँथे ।
सन् २००७ मा इन्डियन आइडल सिजन–३ मा अडिसन दिएपछि उनको जीवनले नयाँ मोड लियो । अन्ततः प्रतियोगिता जित्दै उनले भारतभरि तथा विदेशमा रहेका लाखौं दर्शक–श्रोताको मन जिते।
‘आज जति पनि नेपाली ठूला मञ्चमा गएर गीत गाउँछन् । रियालिटी शोमा पुग्ने आँट सबै प्रशान्तले गर्दा नै मिलेको हो,’ घतानीले थपे ।
इन्डियन आइडल जितिसकेपछि उनको विजय गोर्खा तथा नेपाली भाषी समुदायका लागि गर्वको विषय बन्यो, थुप्रै समूदायले उनको विजय उत्सव मनाएको थियो । इन्डियन आइडलपछि उनले थुप्रै एल्बमहरू सार्वजनिक गरे ।
संगीतसँगै अभिनय करिअर थाले । उनी अभिनित नेपाली फिल्म ‘गोर्खा पल्टन’लाई दर्शकले निकै रुचाएका थिए । पछिल्लो समय भारतीय वेब सिरिज ‘पाताल लोक’ सिजन–२ मा समेत अभिनय गरेका उनले सलमान खानको फिल्म ‘ब्याटल अफ गलवान’मा समेत अभिनय गरेका थिए । ‘अस्ति भर्खर उनीसँग भेट्दा पनि, सलमानको फिल्ममा राम्रो काम भएको छ भनेर सनाउँदै थियो । गीत/संगीतमार्फत संसारभर छरिएर रहेका नेपालीलाई जोड्ने काम गरेको हो उसले,’ घतानीले भने ।
‘ब्याटल अफ गलवान’मा सँगै काम गरेका अभिनेता अनुपविक्रम शाही प्रशान्तलाई कुशल गायकसँगै क्षमतावान अभिनेताका रुपमा उनलाई सम्झन्छन् ।
‘उहाँसँग ब्याटल अफ गलवानको सेटमा ४/५ दिन भेट भएको हो । अत्यन्त मिलनसार, राम्रो व्यक्तित्त्व थियो उहाँको । ४/५ महिनाअगाडि मात्रै भेटेको, म त यो खबर पत्याउनै सकिरहेको छैन,’ अभिनेता शाहीले भने ।
तामाङको एक छोरी र पत्नी छन् । दिल्लीको जनकपुरी भन्ने ठाउँमा बस्दै आएका तामाङको ह्रदयघातबारे सुरुमा सासु आमाले थाहा पाएकी थिइन् ।
त्यसपछि उनले नै सिधै इन्डियन आइडलको साथि अमित पललाई यसबारे खबर गरिन् । अनि मात्रै पलले सामाजिक सञ्जाल इन्स्टाग्राममा यसबारे लेखेपछि तामाङको मृत्युको खबर बाहिरिएको हो ।
दार्जिलिङका गायक महेश सेवा गीतांगेका अनुसार उनको अन्त्योष्टि दार्जलिङमै गर्ने कि दिल्लीमा भन्ने तय भइसकेको छैन ।
