लुम्बिनीको सभामुखमा तुलाराम घर्ती निर्विरोध निर्वाचित,उपसभामुखको लागि चुनाव हुँदै

३ माघ २०७९ मंगलवार, काठमाण्डौ- लुम्बिनी प्रदेश सभाको दोस्रो कार्याकालको तेस्रो बैठक आज बस्दैछ।

मङलबार दिउँसो १ बजे बस्ने प्रदेश सभाको बैठकले उपसभामुख चयन गर्ने। सभामुखमा भने नेकपा माओवादी केन्द्रका तुलाराम घर्ती निर्विरोध निर्वाचित भएका छन।

सोमबार नेकपा माओवादी केन्द्रका तुलाराम घर्तीको एकल मनोयन दर्ता भएकोले उनी सभामुखमा निर्विरोध निर्वाचित हुने भएका हुन।

उपसभामुखका लागि भने तीन जनाको मनोनयन दर्ता भएको छ जसमा नेपाली कांग्रेस, राप्रपा र नागरिक उन्मुक्ति पार्टीले पनि मनोनयन दर्ता गराएका छन।उपसभामुखमा नेपाली कांग्रेसबाट नवलपरासी निर्वाचन क्षेत्र नम्बर १ (१) बाट निर्वाचित विश्वप्रेम पाठक रहेका छन उनको प्रस्तावकमा वसिरुद्दिन खाँ रहेका छन भने राजु खनालले समर्थन गरेका छन।

त्यस्तै उपसभामुखमा सत्तारुढ दलको तर्फबाट राप्रपाकी मेनुका केसी खाँडको प्रस्तावकमा माओवादी नेता तथा प्रदेशसभा सदस्य इन्द्रजीत थारू र समर्थकमा जनमत पार्टी संसदीय दलका नेता चन्द्रशेक गुप्ता रहेका छन।

नागरिक उन्मुक्ति पार्टीबाट उपसभामुख पदमा मनोनयन दर्ता गरेकी निर्मला देवी थारुको प्रस्तावकमा नरमाया ढकाल छन् भने समर्थकमा धर्म बहादुर चौधरी रहेको प्रदेश सभा सचिवालयका सचिव दुर्लभ कुमार पुनले जानकारी दिए।

नेपालको संविधानको धारा १८२ को उपधारा(१) र लुम्बिन प्रदेशसभा नियमावली २०७९ को नियम ७ बमोजिम प्रदेश सभाको सभामुख र उपसभामुख चयन हुन लागेको हो।

कुल ८७ सदस्यीय रहेको लुम्बिनी प्रदेशसभामा १० वटा दलको प्रतिनिधित्व रहेको छ। सात दलका ५६ जना सांसद र स्वतन्त्रका दुई जना गरी ५८ जना सांसदको समर्थनमा सरकार गठन भएको हो।

नेपाली कांग्रेसका २७ र एक/एक जना सांसद रहेका नेकपा एकीकृत समाजवादी र राष्ट्रिय जनमोर्चाले पनि सरकारलाई समर्थन गरेका छैनन।