काठमाडौं, २२ असोज । चौधरी ग्रुपले जेन–जी आन्दोलनका प्रत्येक सहिद परिवारका एक सदस्यलाई रोजगारी प्रदान गर्ने भएको छ । सीजी ग्रुपका प्रबन्ध निर्देशक निर्वाण चौधरीले सामाजिक सञ्जालमार्फत उद्घोष गरेका छन्, ‘जेन–जी आन्दोलनका प्रत्येक सहिद परिवारका एक सदस्यलाई हामी रोजगारी प्रदान गर्नेछौँ। यो केवल हाम्रो वाचामात्र होइन, हाम्रो गहिरो कर्तव्य र श्रद्धा हो।’
साथै, उनले आन्दोलनका सहिदप्रति चौधरी ग्रुपको तर्फबाट हार्दिक श्रध्दाञ्जली एवं परिवारजनप्रति गहिरो समवेदनाका साथ उच्च सम्मान व्यक्त गरेका छन् । जेन–जी आन्दोलनका क्रममा सीजी ग्रुपको निवास, कार्यालय, शोरूम र कारखानाहरूमा ठूलो क्षति भएको पनि उनले स्मरण गरेका छन् ।
पीडादायी घडीमा दृढ आत्मविश्वासका साथ पुनःनिर्माणको यात्रामा अघि बढेको बताउँदै उनले कठिन समयमा चौधरी ग्रुप सहिद परिवारप्रति सँगै उभिने पनि उनले प्रतिवद्धता व्यक्त गरेका छन् । उनले आशा, सहानुभूति र सम्मानसहित देशको सुन्दर र उज्ज्वल भविष्य निर्माणमा लागि रहने प्रतिवद्धतासमेत व्यक्त गरेका छन् ।
चौधरी ग्रुपले समपुर्ण शहिद परिवारलाई सम्पर्क गरिरहेको उल्लेख गर्र्दै उनले कर्पोरेट कम्युनिकेसन विभाग प्रमुख मधुसूदन पौड्याललाई मोबाइल नम्बर 9851224000 मा सम्पर्क गर्न पनि आग्रह गरेका छन् ।
