रामेछाप । स्थानीय तहको निर्वाचनको पूर्वसन्ध्यामा माओवादी केन्द्रका सुनापति गाँउपालिका अध्यक्ष उम्मेदवार ठुलोकान्छा तामाङ र उपाध्यक्ष पदको उम्मेदवार गीता बिष्ट चौलागाईले चुनावी अन्तिम सभामा एउटै मञ्चबाट सुनापतिबासी समक्ष विकासको प्रतिबद्धता गरेका छन् ।
अध्यक्ष उम्मेदवार ठुलोकान्छाले उक्त कार्यक्रममा बोल्दै पिचसडकसँगै बिजुलीको समस्या, महिलाको हक अधिकार, शिक्षा, स्वास्थ्य, खानेपानी, रोजगारी लगायतका समस्या समाधान गर्ने बताए ।
त्यसका साथै कृषि खेतीलाई प्राथमिकतामा राखी खेती गर्नेलाई अनुदान दिने उनले बताए । उनले भने ‘कृषि खेतीलाई प्राथमिकता दिएर बाख्रा, बुङगुर तथा गाईभैसी पालन लगायतका सबै काममा हामीले अनुदानको रकम तथा बजेटहरु छुट्याउनेछौ ।’
त्यस्तै चुनावी सभालाई सम्बोधन गर्दै नेकपा माओेवादी केन्द्रबाट सुनापति गाँउपालिकाको उपाध्यक्ष पदको उम्मेदवारचौलागाईले महिलाको हकहितका साथै शिक्षा, स्वास्थ्य, खानेपानी लगायतको समस्यालाई समाधान गर्ने बताइन् ।
उनले भनिन् ‘मैले पाँच वर्षको अवधिमा यहाँको समस्यालाई बुझेको छु । महिलाको हकहितका साथै शिक्षा, स्वास्थ्य, खानेपानी, पिच सडक, रोजगारी लगायतका समस्याहरुलाई समाधान गर्ने विश्वास मैले लिएको छु । प्रत्येक घरमा खन्ने बितिक्कै धारा र खानेपानीको पूर्ण ग्यारेन्टी हामीले गर्नेछौं । त्यस्तै महिला लक्षित कार्यक्रमहरु अघि बढाउनेछौं ।’
